Hab 3 | NdeIBE | STEP | Umkhuleko kaHabakhukhi umphrofethi. NgeShigiyonothi.

Habakkuk 3

Umkhuleko KaHabakhukhi

1 Umkhuleko kaHabakhukhi umphrofethi. NgeShigiyonothi.

2 Jehova, ngizwile ngodumo lwakho; ngiyazesaba izenzo zakho, awu Jehova. Zivuselele ezinsukwini zethu, yenza zazakale esikhathini sethu; ekuthukutheleni khumbula isihawu.

3 UNkulunkulu wavela eThemani, oNgcwele wavela eNtabeni iPharani. Inkazimulo yakhe yasibekela amazulu lokudunyiswa kwakhe kwagcwala umhlaba wonke.

4 Ubucwazicwazi bakhe babunjengokuphuma kwelanga; imisebe yaphazima esandleni sakhe lapho amandla akhe ayefihlwe khona.

5 Isifo sahamba phambi kwakhe, umkhuhlane walandela amanyathelo akhe.

6 Wasukuma, wanyikinya umhlaba; wakhangela, waqhaqhazelisa izizwe. Izintaba zasendulo zabhidlika lamaqaqa akudala adilika. Izindlela zakhe ngezanini lanini.

7 Ngabona amathente aseKhushani ephakathi kosizi, lezindawo zokuhlala zaseMidiyani zisebuhlungwini.

8 Awu Jehova, imifula wawuyithukuthelele na? Ulaka lwakho lwavuthela izifula na? Ulwandle wawuluthukuthelele na lapho wawugade amabhiza akho lezinqola zakho zempi ezinqobayo?

9 Idandili lakho ulembule, ufune imitshoko eminengi. Uqhekeze umhlaba ngemifula;

10 izintaba zakubona zajanqula, izikhukhula zamanzi zedlula, ulwandle lwahlokoma, lwaphakamisela amagagasi alo phezulu.

11 Ilanga lenyanga kwema mpo emazulwini ekubenyezeleni kwemitshoko yakho entwezayo, ekuphazimeni kwemitshoko yakho ecazimulayo.

12 Wanyathela umhlaba ngolaka, wabhula izizwe ngentukuthelo.

13 Waphuma ukuba ukhulule abantu bakho, ukuba usindise ogcotshiweyo wakho. Umkhokheli welizwe lobubi umchobozile, wamebula kusukela ekhanda kusiya enyaweni.

14 Umhlabe ikhanda ngomkhonto wakhe lapho amabutho akhe ephume ngesiqubu ukuba asihlakaze, ethokoza kungani asezakudla izihlupheki ezazicatshile.

15 Wanyathela ulwandle ngamabhiza akho, uqubula amanzi amanengi.

16 Ngezwa, inhliziyo yami yatshaya, izindebe zami zabikizeliswa ngumsindo; amathambo ami angenwa yikubola, imilenze yami yaqhaqhazela. Kodwa ngizalindela ngesineke usuku lomonakalo ukuba lufike esizweni esihlasela esethu.

17 Lanxa isihlahla somkhiwa singanunkuli lamavini engekho emivinini; lanxa ama-oliva engathelanga, lamasimu engabanga lokudla, lanxa kungelazimvu esibayeni lenkomo zingekho ezitebeleni,

18 kodwa ngizathokoza kuJehova, ngizajabula kuJehova uMsindisi wami.

19 UJehova Wobukhosi ungamandla ami; wenza izinyawo zami zibe njengezempala, ungenza ngihambe ezindaweni eziphakemeyo. Ngeyomqondisi womculo. Ezigincini zami.